Karambola sa Cebu Coliseum

Managsamang  misyon ang sagubangon nilang Rodel ‘Batang Mandaue’ Mayol ug Bert ‘Ninja’ Batawang diin ilang pruybahan kun may purohan pa ba nga mamahimong world champion sa umaabot dihang ilang sangkaon ang tagsa-tagsa nila ka kaatbang gikan sa Thailand karong gabii sa “Back on Track” boxing promotion diha sa Cebu Coliseum. 

Si Mayol (23-3, 18KOs) mosuway og pugong sa iyang sunod-sunod nga kaparotan dihang iyang sangkaon si Wisan Sor Suchanya (9-6-1) sa 10 ka hugna nga non-title fight, samtang si Batawang (51-7, 35KOs) makigsinukliay og kumo ni Thai hard-puncher  Samransak Singmanassak (32-13-1, 26KOs) sa 12 ka hugna nga binukbukay alang sa WBO Oriental light flyweight title.

“This is a very important fight for me. I must come up with an impressive fight and show to everyone that I am back,”  matud pa sa 26-anyos nga si Mayol, kinsa gidumala karon ni Pinoy ring superstar Manny ‘Pacman’ Pacquiao ug topnotch Cebuano promoter Rex ‘Wakee’ Salud.

Si Mayol mopakita sa iyang abilidad atubangan sa iyang mga dumadapig sa labing unang higayon human sa unom ka tuig.  Ang katapusan dihang iyang gipilde si Niño Suelo sa 12 ka hugna nga binakbakay aron paglangkat sa Philippine minimumweight title niadtong Agosto 3, 2002 didto sa Mandaue City Cultural and Sports Complex.

Sila si Mayol ug Batawang  misubay og managlahing dalan sa miagi nilang away.

Si Mayol napukan pinaagi sa fourth round knockout ngadto ni undefeated Mexican prospect Adrian Hernandez niadtong Pebrero 9 didto sa Guanajuato, Mexico, samtang si Batawang mi-iskor og seventh round stoppage ni Indonesian Heri  Amol  sa Invasion: Philippines vs. The World niadtong Abril 6 didto sa Araneta Coliseum.

Sa eksplosibong undercards sa maong promosyon nga gipasiugdahan sa SGG Sports Promotions ni international promoter Sammy ‘Don King’ Gello-ani uban sa Viva Sports, Tanduay Rhum ug Pioneer Elasto Seal, si kanhi PBF flyweight champion Federico 'Magnifico' Catubay (20-14-3) sa SGG Stable moharong ni Brix Bomb Ray sa Tony Dacer Stable sa Davao, samtang  si Pedro Malco sa Zamboanga City moharong  sa way pildeng si Eric Macas (8-0, 5KOs) sa Bong Yap Stable.

Posibleng makakabig og atensiyon si Chum Sedillo sa Amlan, Negros Oriental kinsa moaway sa labing unang higayon isip pro batok ni Rosendo Navares sa Ozamiz City.  Si Sedillo adunay makalilisang nga 23-0  record  ug ang tanan  niyang daog pinaagi sa knockout sa amateur ranks.

Laing moaway sa undercards  mao sila si  Roemart Sentillas (3-0) batok Ed Earl Orellano (4-0-1), Roldan Castrodes (6-0) batok Jerome Buntog (1-3-1), Rodel Adelmita (4-0) batok Edzel Tuñacao (2-0-0), Ryan Tampus batok Jerome Aguirre ug Ariel Adan batok Arnel Dunal.

Ang mga tiket nagkantidad og P50 sa general admission, P100 sa upper box, P250 sa lower box ug P500 sa ringside.