Red Durano Mountainbike championship mosikad na sa Danao City
Sugdan ang aksiyon karong adlawa pinaagi sa road racer sa alas-8:00 sa buntag ug sa ala-1:00 sa hapon mao ang final run alang sa downhill nga mokober og 2.5 kilometros.
Ugma mao ang cross-country race sa managlahing mga kategoriya.
Dul-an sa P300,000 nga ganting salapi ang gigahin alang sa mga mananaog ning maong kompetisyon nga gipasiugdahan sa Danao City Sports Commission ubos sa liderato ni UCI Commissaire ug Danao City Councilor Oscar ‘Boying’ Rodriguez Jr.
Ang duha ka adlaw nga kompetisyon gipahigayon nunot sa kasaulogan sa ika-20 nga katuigan sa mountainbiking sa dakbayan sa Danao.
Ang Danao mi-host sa UCI-sanctioned 3rd Asian Mountain Bike Championship niadtong 1993.
Mao kadto ang unang higayon nga ang Pilipinas mi-host sa kompetisyon nga nakadani og 13 Asian countries sama sa China, Japan, South Korea, Iran, Thailand, Indonesia, Malaysia, Hong Kong, ug uban pa.
Sukad niadto, ang Danao mao na ang binyu sa National Open ug uban pang mga internasyonal nga kompetisyon nga naglakip sa 1st SEA MTB Championships niadtong 2001 ug sa 23rd Southeast Asian (SEA) Games mountainbike event niadtong 2008.
- Latest
- Trending
