Pormal na nga buksan karong buntag ang Mayor Sun J. Shimura Women’s Volleyball Cup Summer Tournament 2008 sa Daanbantayan Cultural and Sports Center.
Katorse sa 20 ka mga barangay nga sakop sa maong lungsod ang mopakita'g aksiyon ning maong inter-barangay nga kompetisyon. Kini mao ang Poblacion, Agujo, Tapilon, Maya, Paypay, Bitoon, Pajo, Dalingding, Malingin, Tominjao, Calape, Lanao, Talisay ug ang Tinubdan.
Usa ka motorkada ang motimaan sa pormal nga pagbukas sa kalihukan nga gikatakda sa alas 9:00 sa buntag nga molibot sa Poblacion, Daanbatayan.
Ang utok sa maong kompetisyon nga si Shimura maoy modeklarar sa pormal nga pagbukas sa torneyo ug sundan sa ceremonial toss uban sa iyang inahan nga si Bise Mayor Maria Luisa Loot.
Gawas sa iyang pagdeklarar sa pormal nga pagbukas, si Shimura manghatag sab og bola ngadto sa tanang barangay atol sa programa.
Ang makampiyon makadawat og P7,000, mopahiluna sa ikaduha mobulsa og P5,000 ug ang ikatulo hatagan og P3,000.