Mura lang og gitiaw-tiawan sa defending champion ang ilang sangka dihang ilang gilampaso sa dakung kasayon ang host Phoenix Suns sa iskor, 115-99 sa Game 3 sa NBA best-of-seven playoffs didto sa US Airways Center sa Phoenix, Arizona.
Tungod sa maong kadaugan, posibleng adto mag-saulog sa first round victory ang 3-0 nga Spurs didto sa Phoenix diin adto gihapon ipahigayon ang Game 4 unya sa Lunes tungod kay wala pa mahitabo sa NBA playoffs nga adunay team nga biya og 0-3 nga misumbalik aron pagdaug sa serye.
Didto sa Dallas, Texas, misikit sa 1-2 ang Mavericks dihang ilang hibaslan ang New Orleans Hornets sa iskor, 97-87 ug posible silang makatabla atol unya sa Game 4 nga adto duwaon sa korte sa Dallas.
Sa bugtong sangka sa East, nakakuha’g 2-1 nga abante sa serye ang Philadelphia Sixers tungod kay ilang gi-usban ang Detroit Pistons pinaagi sa paglubong niini sa iskor, 95-75.
Masuta unya sa Lunes kung aduna ba’y sarang ikasustenir ang Suns batok Spurs kinsang playoff series maoy gihugon-hugonan nga maoy labing nindot nga match-up sa West apan nahug kini’g one-sided affair alang sa Spurs.
Duna sa’y mikatap nga hungihong didto sa Phoenix nga mahimong mataktak sa iyang trabaho isip coach sa Suns si Mike D’Antoni sa higayon nga mapakyas siya sa first round.
Wala dayon makontrolar sa Spurs ang duwa apan dihang nagsugod na sila’g labaw og dako, nagsige na sab og “boo” ang katawhan didto sa US Airways Center ilabi na dihang mi-abot na ang iskor, 70-50 pabor sa Spurs.
Si Tony Parker mikulit ug career-high 41 puntos uban sa iyang 12 ka rebounds samtang si Tim Duncan mi-iskor og 23 puntos ug 10 ka rebounds ug si Manu Ginobili may 20 puntos.
Ang Spurs kanunay gyud maoy naglabaw sulod sa ilang ika-siyam nga sagunson nga duwa sa playoff ug ika-13 sa 14 nila ka seasons.
Si Amare Stoudemire gihapon maoy nangu sa Suns sa iyang 28 puntos ug 11 ka rebounds ug si Leandro Barbosa may 20 puntos apan ilang napugngan si Steve Nash og pito lang ka puntos.
Ang Suns kataposang na-sweep sa playoffs batok sa Portland Trail Blazers kaniadtong 1998-1999 season dihang ang NBA migamit sa best-of-five series sa first round.
Si Shaquille O’Neal mi-iskor og 19 puntos ug si Boris Diaw mitampo ug 10 puntos.