Navaja mipamatuod sa iyang kakusog

Gipamatud-an sa Sugbuanong sprinter Lindley Fran Navaja nga siya'y labing kinakusgang runner sa 2008 Palaro Pambansa pinaagi sa pagpuhal sa early favorite Isidro del Prado sa 200m run sa athletics competition kagahapon didto sa Ramon V. Mitra Jr. Sports Complex sa Puerto Princesa, Palawan.

Wala sab magpabitin ang gymnast nga si Noimi Soco dihang mihakot kini og gold-silver-bronze medals human manghawod sa floor exercise.Mibira sab siya og bronze sa vault apparatus.

Si del Prado gilaumang maoy makatag-iya sa bulawan sa 200m, apan si Navaja mibanat og maayo aron maangkon ang bulawan nga wala niya makuha sa miaging tuig.

Si Navaja, kinsa sakop sa University of Cebu (UC) Athletics Team mi-oras og 22.4 segundos. Nalakip sab si Navaja sa Central Visayas squad nga midaog og silver sa secondary boys 4x100m relay, samtang si John Luke Franco milangkat og bronze sa 400m hurdles.

Sa elementary division, ang Central Visayas mihakot lang og  usa ka silver ug duha ka bronzes.

Si Sarah Mae Napoles, kinsa naghari sa triple jump sa miaging adlaw, igo lang mihakot og silver sa high jump, samtang ang iyang teammate nga si Kirstie Kay Vinco mitiltil og bronze. Mihakot sab og bronze ang Central Visayas sa girls 4x100m relay team nga gipangulohan ni Stella Maris Malingin.  (Uban sa report ni Caecent No-ot)