Hulyo o Agosto sasabak si Donaire

Hulyo hanggang Agosto ang tinitingnan ni world flyweight champion Nonito ‘The Filipino Flash’ Donaire, Jr. na petsa kung saan siya maaaring umakyat sa boxing ring mata-pos ang matagumpay na ikalawang sunod na title defense noong Disyembre 1.

“I’m expecting a fight in July or August but right now I’m doing some training, trying to get in shape, conditioning myself really but not over-training myself like I was training for a fight,” wika ng 25-anyos na si Donaire kahapon.

Matatandaang umiskor si Donaire ng isang eight-round TKO kay Mexican challenger Luis Maldonado noong Dis-yembre 1 sa Mashantucket, Connecticut para patuloy na hawakan ang International Boxing Federation (IBF) at International Boxing Organization (IBO) flyweight crown.

Hindi naman natuloy ang ikatlong sunod na title defense ng tubong General Santos City kay Lebanese challenger Hussein Hussein noong Abril 18 sa Dubai, United Arab Emirates bunga ng pagatras ng promoter.

Sinasabi namang inilagay ni American promoter Gary Shaw si Donaire bilang under-card sa pagdedepensa ni IBF super flyweight champion Dimitri Kirilov kay Vic Darchinyan sa Agosto.

“I don’t know what his agenda but I’m ready to fight anybody whoever they want me to fight,” wika ni Donaire kay Shaw, nauna na niyang inireklamo bunga ng kawalan ng suporta sa kanyang laban kay Maldonado. (RCadayona)