Pacquiao Motambong Sa 'Kadaugan Sa Mactan' Boxing Karong Gabii

Si three-division world champion Manny Pacquiao dia na sba sa Sugbu karong adlawa aron motan-aw sa iyang boxing promotion nga giulohan og "Kadaugan sa Mactan" sugod sa alas 7:00 sa gabii diha sa Lapu-Lapu City Auditorium.

Si Pacquiao, ang WBC ug Ring Magazine super featherweight champion, duyogan nilang kanhi Ilocos Sur governor Luis "Chavit" Singson, event co-presentor Lapu-Lapu City Mayor Arturo Radaza ug WBO bantamweight titlist Gerry "Fearless" Peñalosa sa ringside.

Si WBC No.7 lighweight contender ug OPBF champion Randy "Kumong Bato" Suico maoy mowadwad sa main diin iyang sangkaon si Thai Sornkom Jockeygym sa usa ka non-title bout nga gikatakda sa 10 ka hugna.

Sa eksplosibo sab nga supporting main event, si RP super flyweight champion Eden Sonsona (14-3, 3KOs) sa General Santos City modepensa sa iyang titulo batok ni challenger Richard Olisa (10-8-4, 7KOs) sa Manila.

Angayan sab nga saksihan sa mga Sugbuanon mao si kanhi PABA light flyweight champion Marvin "Leyte Bomber" Tampus nga makitakos batok ni  Allan Rañada sa Jagna, Bohol .

Sa lain pang undercards, mopakita og aksiyon mao sila si Darrel Pucdol vs. Dante Contiga, John Reil Casimero vs. Darryl Amuncio, Daniel Ponce Villacura vs. Esrael Sapo, Jayson Siaton vs. John Mark Ranan, Rodulfo Sumabong vs. Tantan Recablanca, Tata Tadena vs. Emelio Ervas, ug Adonis Aguelo vs. Jose Ocampo.

Human sa boksing karong gabii, si Pacquiao mopuyo pa og pipila ka adlaw dinhi sa Sugbu gumikan kay siya man maoy modala sa papel ni Datu Lapu-Lapu sa gikahinaman nga re-enactment sa maksaysayanon nga "Kadaugan sa Mactan" karong Abril 27. Ang iyang kapikas nga si Jinkee maoy modala sa papel sa asawa ni Lapu-Lapu nga si Princesa Bulakna, samtang si actor-model Dennis Trillo maoy modala sa papel ni Portuguese navigator Ferdinand Magellan. Si Pacquiao gikatakda nga molarga sa Amerika sa dili pa matapos ang bulan aron sugdan ang iyang training sa umaabot niyang away batok ni WBC lightweight champion David Diaz karong Hunyo 28 didto sa Mandalay Bay Hotel and Casino sa Las Vegas, Nevada.