Sirlitz Clinic 2nd Batch Sa Mayo 5

Sugdan na sa Sirlitz “Play Like the Pros” One-on-One summer basketball clinic ang pagdawat ug mga estudyante alang sa second batch nga magsugod unya sa Mayo 5 didto gihapon sa Guadalupe Sports Complex.

Si Edsel Vallena mibutyag nga iyang sayo-on ang pagdawat sa mga estudyante alang sa second batch tungod kay ang first batch matapos naman unya sa sunod semana.

Sa ksamtangan, may 80 ka mahiligon sa basketbol ang mipalista sa Sirlitz Clinic ug matod pa ni head trainor ug coach Edsel Vallena nga mas daghan unta ang iyang mga estudyante kung wala pa ma-usab ang skedyul sa iyang paggamit sa gym hinungdan nga temporaryo siyang midangop didto sa Labagon gym bale’g usa ka semana.

Gawas sa mga maanindot nga footwork ug maayong mga porma sa pag-shoot, dribble ug pasa, tudlo-an sab ang mga kabataan sa saktong pamaagi unsaon pagdepensa ug shot selection sa opensa.

Adunay libreng bola ug upper jersey nga ihatag kada estudyante sa kantidad nga P/1 ka libo ka pesos atol sa training.

Makadawat sab ang mga bata ug certificates of graduation.

Unya sa kataposan sa Mayo, mopili na si Vallena ug most valuable player (MVP), rookie of the year, best defensive, best in shooting, best in dribbling, best in passing ug uban pang mga individual awards sa most imrpoved, most coachable ug most disciplined player.

Ang pagpanghatag ug mga individual awards pagahimo-on sa lain-laing age categories gikan sa 10 years below, 13 years below ug 15 year below, matod pa ni Vallena.