Nakadale ang Dragons

Pumabor na rin sa wakas sa Welcoat ang ihip nang hangin nang makadagit sila ng panalo  matapos mabigo sa unang apat na laro, 15 sapul pa noong nakaraang kumperensiya.

Nagbida si Joe Devance sa pagkamada ng siyam sa kanyang tinapos na 16 puntos sa final canto tungo sa 110-103 panalo ng Welcoat kontra sa paboritong Purefoods Tender Juicy Giants sa pagpapatuloy ng classification phase ng 2008 PBA Fiesta Conference kahapon sa Araneta Coliseum kagabi.

Umangat ang Dragons upang makaangat mula sa kulelat na posisyon kung saan naiwan ang Ginebra na wala pang panalo sa apat na laro ngunit kasalukuyan pa silang nakikipaglaban sa Magnolia Beverage habang sinusulat ang balitang ito.

“Ang sarap pa lang manalo sa PBA. At least ang feeling ko ngayon nasa PBA na talaga ako,” ani interim coach Caloy Garcia ng Welcoat na huling nakatikim ng panalo noong Nobyembre 16 sa 95-93 laban sa  Magnolia sa 2007 PBA Philippine Cup. “But I think the credit should go to the players because they played their hearts out today.”