Hazel Son mihakot og lima ka medalya

Mihakot og lima ka medalya, usa niini gold medal ang 10-anyos nga Filipina swimmer didto sa Australia ang si Hazel Son dihang iyang gitapos ang 100-meter long course backstroke ug 1:28.96 atol sa 2008 Swimming WA Junior Championships sa miaging Abril 5-6 didto sa Challenge Stadium sa Perth, Australia.  Sa lima ka events nga iyang gisalmotan, si Son mihakot ug usa ka gold medal, tulo ka silver medals ug usa sab ka bronze medal. Usa lang siya sa labing inila nga swimmer nga nagrepresentar sa Aquajets Swimming Club.

Si Son anak ni kanhi University of Cebu (CCC) Webmasters power forward Harley Son nga gikan sa lungsod sa San Remigio, Cebu. Iyang nakuha ang silver sa 100-meter LC freestyle sa takna 1:12.70, 200-meter LC freestyle sa takna 2:37.50 ug 100-meter LC backstroke sa takna 1:21.09.

Igo lang siya nakakuha’g bronze medal sa 100-meter LC butterfly sa takna 1:23.40.

Ubay-ubay sab sa mga kauban niya sa Aquajets ang mihakot ug bulawang medalya sa laing events ug sa nagkalain-laing age categories.

Ang iyang maguwang nga si Harme, 12 anyos, wala mosalmot ug lumba sa langoy kaniadtong miaging semana kay nakuwangan ang iyang pagbansay-bansay tungod kay mibakasyon man ang iyang pamilya ug usa ka buwan dinhi sa Sugbo kaniadtong Enero atol sa CCC Grand Alumni Homecoming diha sa Cebu Coliseum diin si Harley usa sa mga major sponsors.  Lakip sa mga sponsors niadtong maong kalihokan ang mga kanhi CCC players nga atua na manimuyo sa Estados Unidos nga naglakip kanila ni Rey Yncierto, Jofrey Macoy, Allan Ceniza, Ben Ocariza, Percius Curugan, Boy Partoza ug Caesar Borromeo.

Ang mga local sponsors mao sila si Dondon Hontiveros, Freddie Abuda, Naga City Mayor Val Chiong, brothers Rockey, Ritchie ug Baban Bacalso ug Webmasters coach Roel Gomez.