Sa makausa pa, misamot na gyud kakulba-hinam ang panagtigi sa ikawalo ug kataposang luna sa playoff sa Western Conference dihang midaug ang Golden State Warriors ug napilde ang Denver Nuggets sa ilang krusyal nga sangka hinungdan nagtabla na sab sila karon sa 48-32 nga baraha.
Nabuhi ang paglaum sa Warriors dihang ilang gipukan ang Los Angeles Clippers sa iskor, 122-116 didto sa Oracle Arena sa Oakland, California samtang ang Nuggets miyukbo sa mga kamot sa Utah Jazz, 97-124 didto sa Delta Center sa Salt Lake City, Utah.
Sila si Stephen Jackson ug Baron Davis maoy mitimon sa Warriors alang ngadto sa krusyal nga kadaugan. Si Jackson mipusa ug 28 puntos ug si Davis may 25 puntos samtang parehong mihipos og 17 puntos sila si Monta Ellis ug Al Harrington.
Ang pilderong Clippers gipangulohan ni Cuttino Mobley pinaagi sa iyang 30 puntos.
Sa laing bahin, tulo ka Jazz ang mihakot og tag 20 puntos lakip nilang Mehmet Okur kinsa may 15 ka rebounds aron pagbaswat sa Utah. May 20 puntos sab sila si Carlos Boozer ug Ronnie Brewer samtang may 19 puntos si Deron Williams ug may 12 puntos si Jason Hart. Daku kaayo'ng kalainan ang kanhi Jazz sa 2000-01 nga season nga may 53-29 nga baraha ug karon nahimo na kining 53-27 nga baraha sa kasamtangan.
Ang Denver nagbitay pa gyud karon ilabi na kay ang Houston Rockets maoy ilang sunod ikasangka.
Si Allen Iverson mipuntos ug 28 aron pangulohan ang Nuggets sundan ni Carmelo Anthony sa iyang 22 puntos. Sa laing duwa, gipukan sa Sacramento Kings ang New Orleans Hornets, 94-91 ug naghatag ug higayon sa LA Lakers pagsakmit sa liderato sa West Conference nga taudtaud nang gihuptan sa Hornets.
Midaug ang Charlotte Bobcats batok Indiana Pacers, 107-103, padayong naghari ang Boston Celtics batok sa Atlanta Hawks, 99-89, midaug ang Washington Wizards batok Philadelphia Sixers, 109-93, mikulit ug laing daug ang New Jersey Nets batok Milwaukee Bucks, 111-98, ug gipakuratan sa Portland Trail Blazers ang dallas Mavericks. 108-105.