Gisugdan na niadtong miaging adlaw sa Time Out Summer Basketball Clinic ang pagpanawat og estudyante alang sa Danao expansion nga mosikad karong Abril 13 sa Danao City Sports and Civic Center.
Si training camp director Rex Salvaña, kanhi Cebu Gems assistant coach sa nabungkag na nga Metropolitan Basketball Association (MBA), miingon nga nagpadayon sab ang registration alang sa Liloan leg nga nasugdan niadtong Lunes didto sa Panphil B. Frasco Memorial Sports Complex.
Ang summer basketball clinic nga bukas sa mga kalalakin-an ug kababayen-an gilangkuban og duha ka levels - ang beginners alang sa magduduwa nga nagpangedaron og siyete hangtod sa 12 anyos ug ang advanced alang niadtong nagpangedaron og 13 hangtod sa 17 anyos.
Ang training sessions himuon sa alas-8:00 hangtod sa alas-10:00 sa buntag alang sa beginners ug alas-10:00 sa buntag hangtod sa alas-12:00 sa udto alang sa advanced campers.
Ang registration fee nagkantidad og P1,000 libre na ang basketball ug training uniform. Alang sa dugang kasayoran tawag o text sa 0916-5644385 o 0916-4533639.