Kulbahinam nga duwa ang masaksihan na sab karong adlawa sa pagpadayon sa 2nd M. Lhuillier Kwarta Padala All-Ladies Beach Volley Open diha sa Wiggy's Beach Resort sa Lilo-an, Cebu.
Kini gumikan kay sila si Jessa Satina ug Lorie Mae Layno sa Southwestern University (SWU) Team B moharong man nilang Erika Camille Verano ug Herlene Ybarita sa University of Southern Philippines Foundation (USPF) Team A sa tinaktakay nga duwa.
Ang SWU Team B nga kasamtangang nagtangag og 4-1 record, kinahanglan nga modaog karon sa ilang duwa batok sa USPF Team A aron dili manamilit og sayo sa maong kompetisyon.
Kun molampos ang SWU Team B, makamugna kini og triple-tie sa Bracket A uban nilang Jusabelle Brillo ug Janez Armie Igot sa defending champion University of the Visayas (UV) ug Michelle Simbajon ug Genie Sabas sa University of San Jose-Recoletos (USJ-R) Team A.
Matud pa ni tournament manager Raul Gonzales sa Cebu Volleyball Federation (CVF) nga kun mahitabo ang triple-tie, ilang gawion ang Olympic quotient system pagbuak sa panagtabla ug pag-ila sa duha ka teams nga makaangkon og luna sa semis.