Time Out Summer basketball clinic sa Liloan ug Danao City

Mga aspiring hoopsters sa amihanang bahin sa Sugbu adunay higayon nga mobaid sa ilang talento gumikan kay ang Time Out Summer Basketball Clinic molatas man diha sa munisipalidad sa Liloan ug sa  dakbayan sa Danao.

Ang Liloan  summer cage clinic nga  pangulohan ni Rex Salvaña,ang  kanhi Cebu Gems assistant coach sa nabungkag nga Metropolitan Basketball Association (MBA) sugdan karong Abril 7 sa Liloan Kai Sports Complex.

Ang Danao leg buksan sa Abril 13 sa Danao City Sports and Civic Center.

Ang duha ka buwan nga programa nga bukas alang sa kalalakin-an ug kababayen-an adunay duha ka  levels -- ang beginners  alang  niadtong nag-edad og  siyete hangtod sa 12 anyos ug advanced alang sa nagpangedaron og 13 hangtod sa 17 anyos basketeers.

Ang training sessions himuon gikan sa alas-8:00  hangtod sa alas-10:00 sa buntag  alang sa beginners ug alas-10:00  sa buntag hangtod sa alas-12:00 sa udto  alang sa advanced campers, gikan sa Lunes hangtod sa Sabado.

Ang registration fee nagkantidad og P1,000 libre na ang basketball ug training uniform.

Alang niadtong buot magparehistro ug dugang mga kasayoran, tawag o text  sa 0916-5644385 ug 0916-4534639.

Aron pagseguro og kalidad nga  training, si Salvaña kinsa migiya sa Holcim Pryce Pharma MisOr ngadto sa talagsaong  grandslam sa Mindanao Visayas Basketball Association (MVBA), mikuha sa serbisyo sa mga banggiitang coaches kinsa sikat sab kaniadto atol sa iyang panahon aron moabaga kaniya sa pagpadagan sa training camp.

Gikuha ni Salvaña mao sila si Reggie Licanda, ang head coach karon sa University of Cebu (UC) Junior Webmasters, Opel Abellana ang chief bench tactician sa University of San Carlos (USC)-South Campus ug kanhi pro-star Teroy Albarillo kinsa lawom na kaayo og kasinatian sa coaching.

Dul-an sa 100 ka partisipante ang misalmot sa 10th season sa tinuig nga Time Out basketball camp nga gibuksan niadtong Martes didto sa Cebu Coliseum.