Gipangluba kaatbang sa Power Floor, Liquid Tile ug Roof Shield

Gipangluba sa Power Floor/UAP Cebu-Sugbu, Liquid Tile/UAP Lapu-Lapu, Polyflor ug Roof Shield ang ilang tagsa-tagsa nga mga kaatbang aron pagposte sa ilang ikaduhang sunod-sunod nga kadaugan sa Davies  Cup  2008 basketball tournament didto sa Metro Sports Center.

Ang upat  ka  koponan temporaryo karong naghari sa ilang tagsa-tagsa ka brackets sa managsamang 2-0 win-loss records.

Ang  Liquid Tile/UAP Lapu-Lapu kinsa mipakita og milagro aron pagpukan sa Sun and Rain/UAP Rajah Humabon sa iskor nga 80-74, samtang ang Polyflor nakigsawo sab sa kadaugan sa Liquid Tile pinaagi sa pagpukan sa Mortaflex sa iskor nga 79-61 aron pag-una sa bracket-A.

Bugnaw ug wala kaayo makahungaw ang kainit sa Liquid Tile sa unang kuwarter hinungdan nga nabiyaan kini, apan mi-rally  kini  ug mao na ang mikontrolar sa duwa sa ikatulong kuwarter.

Human milabaw og dos puntos, 54-52 pagsugod sa fourth quarter, ang Liquid Tile mipaburot sa ilang labaw ngadto na sa 10 puntos sa wala pa ang Sun and Rain milusad og rally aron pagkitkit sa labaw ngadto na lang sa dos puntos sa makadula ka higayon. Katapusang nakasikit ang Sun and Rain sa iskor nga 71-73 kortesiya sa ilang team captain nga si Rolan Alberto.

Si Roy Ramodez  maoy mitimon sa Liquid Tile sa nanghinapos nga bahin sa duwa nga mipatuasik og  pito  sa iyang 18 puntos sa katapusang dos minutos aron pagkandado sa kadaugan. Apan si Mark Capili maoy topscorer sa mga architects gikan sa UAP Lapu-Lapu Chapter nga mibugha og 20 puntos.

Si Vincent Sesbreño mao usab ang nangulo sa naparot nga Sun and Rain sa iyang 26 puntos, apan nakawang ang iyang paningkamot gumikan kay wala kini makakuha og maayong suporta sa iyang kaubanan.

Sa laing kumbati sa bracket-A, ang Polyflor  nagsalig sa ilang lima ka magduduwa kinsa mirehistro og double digits aron pagbuntog sa Mortaflex. Talagsaon kaayo ang gipakitang duwa sa Polyflor ug igo lang nila gipa-iskor ang Mortaflex og nuybe puntos sa fourth quarter aron pagsakmit sa ikaduhang daog.

Si Jim Querubin maoy nangulo sa lima ka players sa Polyflor nga nakakuha og double figures sa iyang 18 puntos.

Sa bracket-B, ang Power Floor/UAP Cebu-Sugbu mipulbos sa Classitex sa iskor nga 79-60. Si Criz Matunod maoy nangulo sa Power Floor nga milansang og 25 puntos, samtang si Antonio Decatoria miabuno og 19 puntos.

Si Al Sanchez kinsa miposa og   24 puntos maoy nangulo sa pilderong Classitex. Ang Roof Shield milubong sa Acreex sa iskor nga 87-70 ubos sa liderato ni Efren Bauga kinsa mibahog og 29 puntos.