Nakig-uban na sa pundok sa mga mananaog ang Cabrite ug Morehai human nila gipilde ang ilang tagsa-tagsa nga kaatbang sa 1st Jeson Guardo Pasalamat Cup basketball tournament didto sa Barangay Tisa Sports Complex.
Gidominar sa Cabrite ang duwa gikan sa pagsugod hangtod na sa pagkahurot sa oras aron pagpukan sa Purok III sa iskor nga 82-72, samtang ang Morehai nakapahungaw sa ilang kainit gikan sa ilang kabugnaw pagsugod sa duwa aron paglubong og 11 puntos sa Motra sa iskor nga 61-50.
Ang Cabrite wala na molingi pa human milabaw og kuwatro puntos 34-30 paghuman sa first quarter.
Misulbong pa ang maong labaw ngadto na sa nuybe puntos sa iskor nga 59-68 paghuman sa ikatulong kuwarter ug maoy naghatag og kasiguroan sa ilang kadaugan.
Sa laing duwa, ang Morehai nabiyaan og tres puntos sa iskor nga 15-18, apan nakabawi kini sa second quarter aron pag-ilog sa labaw, 31-30 sa paghuman sa first half. Sa kainit sa duwa sa Morahei ilang gilupig sa scoring ang Motra, 30-20 hinungdan nga miburot og maayo ang ilang labaw dayon na pag-angkon og 11 puntos nga kadaugan.
Hugtanong gipaluyohan sa Tisa Barangay Council ubos sa liderato ni Barangay Captain Eduardo Cabulao, ang torneyo nga gidumala ni Erby Diola gipasiugdahan sa notadong sports patron Jonathan ‘Atan’ Guardo, kinsa mao usab ang presidente sa Uniherb Philippines, ang tiggama sa naila na kaayong food supplements sama sa Arthro, Heartvit ug Kidneycare.