Gejon naparot didto sa Japan

Sa  duha ka sunod-sunod nga adlaw, lain na sab nga dekalibreng Pinoy'ng boksidor ang naparot sa Japan.

Ning higayona, si Eriberto 'Yukka' Gejon ang nahagba human kini gipukan sa Hapon nga si Yuki Kanemitsu pinaagi sa "split decision" sa 10 ka hugna nilang binukbukay niadtong Domingo didto sa IMP Hall sa Osaka.

Niadtong Sabado sa Tokyo, ang kauban ni Gejon sa Rex  'Wakee'  Salud Stable nga si Jimrex Jaca ang napilde sab pinaagi sa sikit kaayong "unanimous decision" ngadto ni Kengo Nagashima.

Ang maong kapildihan maoy ikatulong sunod-sunod ni Gejon ug ikaupat sa kinatibuk-an sa 28 niya ka away.

Sa wala pa makigharong ni Kanemitsu, si Gejon mihaw-as gikan sa makauulaw nga kapildihan pinaagi sa knockout sud sa unang hugna ngadto ni Nicaraguan Roman Gonzalez niadtong Nobiyembre 3 sa miaging tuig didto sa Korakuen Hall sa Tokyo.

Si Gejon nadakin-as ngadto sa 23-4-1 uban ang 14KOs, samtang si Kanemitsu mi-inat sa iyang rekord ngadto sa 11-1 nga gidayan-dayan og 6KOs.