Gejon mo-away sab karon sa Japan

Mobalik na sab og away si two-time world challenger Eriberto 'Yukka' Gejon Jr. human mipahuway sud sa upat ka bulan  sa dihang iyang harungon ang Hapon nga si Yuji Kanemitsu sa 10-round non-title bout karong adlawa sa IMP Hall sa Osaka, Japan.

Mao kini ang labing unang pagkatkat ni Gejon ibabaw sa ring human sa makauulaw niyang kaparotan pinaagi sa first round knockout ngadto ni Nicaraguan Roman Gonzalez niadtong Nobiyembre 3 sa miaging tuig didto sa Korakuen Hall sa Tokyo.

Sa wala pa mahitabo, si Gejon mihagit sa ikaduhang higayon ni Yutaka Niida alang sa WBA minimumweight title apan napilde siya pinaagi sa unanimous decision sud sa 12 ka hugna niadtong Septiyembre 1, 2007. Sa una niyang pagsuway nga sakmiton ang WBA title, napukan sab siya pinaagi sa kuwestiyonableng technical decision sa ika-10 nga hugna ngadto sa Hapon nga kampiyon.

Human sa makapakugang niyang kapildihan ngadto ni Gonzalez, si Gejon mipakita og determinasyon nga ibalik ang iyang nahanaw nga garbo ug dungog gumikan kay hugtanon kining nagbansay-bansay sa nabaniog nga ALA Boxing Gym.Nakadugang sa inspirasyon ni Gejon nga maningkamot og maayo aron pamatud-an nga duna pa siya'y ikabuga mao si boxing patron ug Tagbilaran City Mayor Dan Neri Lim nga kabahin na karon sa iyang management team.

Si Gejon, usa ka kanhi amateur standout, naglukdo og impresibong 23-3-1 win-loss-draw record  uban ang 14KOs, apan napilde siya katulo sa katapusan niyang lima ka away.

Sa iyang bahin, si Kanemitsu, nga wala maka-away gawas sa Osaka ug makigsangka sa labing unang higayon batok sa usa ka Pinoy sa lima ka tuig na niyang pro career, nagbitbit og 10-1 win-loss record uban ang 6KOs.