Gipukan sa masaarong Cebu karter Juan Antonio L. Carcel ang reigning Asian champion ug ang ubang mga bantugang racers sa Manila aron pagdaog sa kampiyonato sa Mini ROK division sa 2008 Shell National Karting Series niadtong miaging adlaw didto sa Carmona racetrack sa Carmona, Cavite.
Nakigsakbang sa mga lig-ong kaatbang nga gipangulohan ni Asian champion Christian Gaddi, ang 12-anyos nga si Carcel mipakita sa iyang kasibot aron pagdominar sa adrenaline-pumping race nga sikit kaayo gikan sa pagsugod ngadto sa pagkahuman sa karera.
Sila si Carcel, Gaddi ug Jette Calderon maoy mainiton nga nagtigi, apan ang tinun-an sa PAREF-Springdale mibulhot sa katapusang liyok sa final ug 15th lap aron maapsan ang iyang mga karibal ug kadugayan iyang naangkon ang checkered flag sud sa 49.2 segundos.
Si Calderon maoy mi-okupar sa ikaduhang dapit sa iyang 49.35 segundos ug si Gaddi napunta sa ikatulo nga mitapos sa oras nga 49.54 segundos.
Mao kini ang ikaunom nga titulo ni Carcel sud sa iyang duha ka tuig nga pagsalmot og go-cart racing. Niadtong 2006, si Carcel mitapos sa ikaduha sa Asian Karting Series didto sa Macau, China.