Allied Bank, Wealthbank mipukan sa ilang kontra

Gitilok una ang tanang puwersa sa Allied Bank sa wala pa nila pahamtangi ang CUBA Kings sa ilang unang kapildihan, 75-66, samtang  ang Wealth Bank naumod human sa ilang 17 puntos nga labaw sa unang kuwarter, apan nakabangon kini aron pagpukan sa dinaog-daog nga CUBA Spurs sa iskor nga 63-59 sa 2008 Cebu United Bankers Association (CUBA) First  Conference basketball tournament didto sa Our Lady of Sacred Heart Parish Gym.

Naglabaw og otso puntos ang Allied Bank paghuman sa unang kuwarter, 21-13, apan ang CUBA Kings mibawos sa ikaduhang kuwarter pinaagi sa pagpabuto og  21-11 aron pag-ilog sa labaw, 34-32 sa first half.

Dali sab hinuon nga nakabawi ang Allied Bank sa ikatulong kuwarter ug ilang nailog og balik ang labaw,  58-55 ug hinay-hinay ilang nakab-ot ang kadaugan.

Ang Allied Bank nagbitbit  na og 2-1 win-loss record, samtang ang CUBA Kings adunay 3-1 nga baraha.

Sa sayo pa, ang Wealth Bank nakabentaha og 17 puntos paghuman sa  first quarter, 28-11.
Apan ang CUBA Spurs  makanunayong misapsap sa labaw hinungdan nga mitibugsok ang labaw sa Wealth Bank ngadto na lang sa 12 puntos, 35-37 paghuman sa second quarter.

Minipis og maayo ang labaw sa Wealth Bank ug miabot na lang kini ngadto sa sayes puntos, 47-41 luyo sa paningkamot sa  CUBA Spurs.

Makatilaw na unta sa ilang unang kadaugan ang  CUBA Spurs dihang nagkanipis og maayo ang labaw sa Wealth Bank apan wala nila maangkon ang kahigayonan nga nahutdan na kini sa oras.

PUNTOS MATAG USA

Unang duwa:

Wealthbank (63)  -- Allera 17, Rizada 11, Ortiz 9, Miñoza 6, Navarro 6, Osorio 6, Mirafuentes 4, Dominquez 4

Cuba Spurs (59) -- Lapuz 15, So 11, Maravilla 9, Tapaya 8, Ceniza 6, Martinez 6, Olalo 4

Ikaduhang duwa:

Allied Bank (75) -- Nemenzo 19, Mancera 15, Palarca 9, Dave 9, Ong 7, Kim 6, Yu 5, Dre 5,

Cuba Kings (66) -- Letrero 18, Aparri 11, Yap 10, Go 10, Solon 6, Dabon 5, Castillo 4, Chua 2