Adunay 16 ka teams ang misalmot sa 7th Eduardo Mendoza Sr. Memorial Cup All-Filipino Inter-City basketball league nga nga gibuksan niadtong miaging adlaw didto sa Elmcor gym sa Queens New York City.
Ang liga gipahinungod sa kanhi inilang magduduwa sa University of the Visayas (UV) Green Lancer nga si Eddie Mendoza Sr. Si Mendoza sakop sa UV team nga nakampiyon sa National Inter-Collegiate sa tuig 1957. Uban ni Mendoza mao ang kanhi nilang UV coach nga si Maximo Bas ug kanhi Olympian Joaquin Rojas kinsa mitapos sa iyang basketball career sa University of Cebu (kanhi CCC).
Si commissioner Anacleto 'Dodong' Endrino, Jr. mibutyag nga ang duha sa 16 ka teams nagdala sa ngan sa lugar sa Sugbu -- ang Minglanilla ug Mandaue Bomb Squad.
Ang Minglanilla pangulohan sa iyang anak nga si Janjan Endrino, samtang ang Mandaue Bomb Squad pangulohan usab ni Drazen 'Taten' Ceniza, sakop sa Ceniza clan sa Cabangcalan.
Kasagarang misalmot mga sakop ni Allan Ceniza, ang presidente sa Monday-Wednesday Club nga adunay dul-an 200 ka mga miyembro.
Matud pa ni Endrino nga unom lang sa 16 ka teams ang mo-abante ngadto sa semifinals. Ang mahabiling unom ka teams moduwa og single round robin ug ang top two maoy magkumbati sa finals ug ang top-3 ug top 4 maoy mag-ilog sa ikatulong dapit.
Usa sa mga highlights sa opening ceremonies mao ang pagpili og "best muse" ug best in uniform." Ang mapiling best muse makadawat og ganti nga round-trip ticket (New York-Philippines) gikan sa managsuong Mendoza nga sila si Eddieboy Jr. ug Mike, ang coach sa Minganilla team.