Aquastars Gilumsan Sa Bogoys

Nanimaho na ang gipa-abot nga sangka tali sa no. 1 Lapulapu City Chiefs batok sa no. 2 nga Bogo City Bogoys alang sa kampiyonato sa 1st Inter-City Challenge Cup basketball tournament tungod kay usa na lang ka daug ang ilang gikinahanglan aron mo-abante sa finals.

Kini human maka-eskapo ang Bogoys batok to Talisay Aquastars sa miaging adlaw sa Game 1 sa ilang best-of-three semifinals didto sa Don Celestino Martinez Sr. Memorial Coliseum sa iskor, 97-92. Unang mikulit ug daug ang Chiefs batok sa Danao Pistols sa iskor 91-64.

Sa pagbalhin karon sa duwa didto sa Danao ug sa Talisay, parehong suwayan sa Lapulapu ug Bogo ang pagkuha ug 2-0 nga daug aron ikatakda dayon ang petsa sa finals.

Dili sama sa resulta sa Lapu-lapu-Danao nga duwa nga dako kaayo’g biya ang Pistols, gilauman nga mas kulbahinam ang mahimong resulta sa duwa tali sa Talisay ug Bogo.

Niining duwa-a, daw sa dehado sab gamay ang Bogo tungod kay layu-layo ang ilang biyahe susama nga ang Talisay mibiyahe sab ngadto sa Bogo sa miaging adlaw aron lang pagpanulong didto apan kusganong mipugong sa Bogoys aron dili sila malubong og maayo.

Ang Bogoys nagsalig pag-ayo kanila ni Jun Ace Ursal nga kanhi mga varsity players dinhi  sa dakbayan samtang ang Talisay dako sab og pagsalig sa ilang katakos ilabi na kay anaa sila’y pambato lakip nilang Rico Tabar ug manag-agaw nga sila si Alejandro ug Alfie Cabañero.