Hawks Midagit Sa Miami

Ang Atlanta Hawks nga malaomon nga makakuha sa kataposang luna sa playoffs sa Eastern Conference , napilde sa protesta apan kaduha modaug sa duwa batok sa Miami Heat. Sa gihimong replay tali sa Atlanta ug Miami, midaug gihapon ang Hawks sa iskor, 97-94 sa duwa sa National Basketball association (NBA) didto sa Philips Arena sa Atlanta, Georgia.

Gitugotan sa NBA ang protesta gikan sa kampo sa Miami sa kataposang 51.9 segundos sa ilang duwa dito sa Miami Arena kaniadtong Disyembre sa miaging tuig tungod kay nasaypan sa statistician nga si Shaquille O’Neal may unom na ka fouls apan sa tinuoray lima pa lang diay ang iyang fouls kay ang foul nga nahimo ni Udonis Haslem sa may 3:24 ang nahibiling oras sa regulation, didto malista sa iyaha.

Busa, si O’Neal na-fouled out na sa overtime period niadtong duwa-a apan diay dili pa tungod kay lima pa lang ang iyang fouls.
Ang Atlanta may 114-111 nga labaw sa overtime batok sa Miami dihang gitugotan ang overtime. Hinoun, sa pagpahigayon sa replay, wala na makaduwa si O’Neal kay gi-trade na man siya didto sa Phoenix Suns sa miaging buwan.

Nahitabo ang unang replay sa NBA kaniadtong Disyembre 1982 diin midaug sa protesta ang San Antonio Spurs sa ilang double overtime nga kapildehan ngadto sa Los Angeles Lakers, 132-137. Dihang gihimo ang replay, midaug ang Spurs, 117-114. Matawag kini ug “history repeats itself” kay parehong midaug ang Spurs ug ang Hawks sa replay ug tres puntos.

Ang Atlanta nga aduna nay 25-36 nga baraha, gipangulohan ni Joe Johnson kinsa mitabla sa season-high 37 puntos.

Si Dwayne Wade maoy nangu sa Miami kinsa aduna nay 11-49 nga baraha, ang labing ubos nga record sa NBA karon nga season.

Sa laing duwa, padayong nagdominar ang Boston Celtics human ilang gipukan ang Memphis Grizzlies ug 30 puntos, 119-89, midaug ang Cleveland batok Indiana, 103-95, naka-ipsot ang Charlotte batok Washington, 100-97, gipakaging sa Golden State ang Orlando Magic, 104-95, midaug ang Portland batok sa New York, 120-114, milampos ang Houston Rockets batok sa New Orleans, 106-96, midaug ang Dallas batok New Jersey, gilat-an sa Utah ang Denver, 132-105 ug nakabunal ang Minnesota batok sa LA Clippers, 99-96.