Melindo nagmalampuson

Nagpabilin gihapon nga  walay pilde si WBO Asia-Pacific minimumweight champion Milan ‘Milenyo’ Melindo human  midaog batok sa bisitang Indon nga si Sofyan ‘Cobra’ Effendi  pinaagi sa “unanimous decision” sa makalingaw’ng main event sa “Do or Die: "Power of Two" boxing extravanganza niadtong Sabado sa gabii didto sa Mandaue City Cultural and Sports Complex.

Si Melindo  mipabuhagay sa tanan niyang abilidad ibabaw sa ring, apan wala kini makatumba ni Effendi kinsa nakalahutay sa gikatakda nilang 10 ka hugna nga binakbakay.

Bisan og lawom na ang kagabhion, ang crowd nagpanlad-ok sa kahinam kay si Melindo ug ang iyang makalingaw nga kaatbang nga si Effendi walay tihik-tihik  nga nagsinukliay sa ilang rapid-punches sa makadaghan nga higayon.

Si Melindo mipatama og solid shots ngadto sa ulo ug lawas ni Effendi,  apan ang protagonista sa Cagayan de Oro City tataw kaayo nga kulang og punching power  aron pagtumba sa  langyaw’ng boksidor.

Angayan sab nga hatagan og credit si Effendi tungod sa iyang kaisog ug fight heart. Si Effendi bisan og gidabodabohan og maayo wala gyud  kini  mo-atras ug  nakasugnod hinuon kini sa iyang kaisog.

Nakapahimuot sab si Effendi sa mga fans  nga walay kukahadlok nga mohamag sa panahon nga  masagunto kini ni Melindo.

Ang tulo ka hurado mi-iskor og 97-93, 98-92 ug 96-94 alang kang Melindo nga nagbitbit karon og baraha nga  15-0, 4KOs, samtang si Effendi nahagba sa 7-5-1, 6KOs.

“It’s a good fight. He’s (Melindo) impressive, but he has to be more aggressive next time,”  matud pa ni ALA Promotions president Michael P. Aldeguer.

Sa supporting main event, lain ALA rising star nga si Weng Haya (9-1, 5KOs) milampos sa iyang unang bug-at nga tahas human midaog pinaagi  sa 10-round unanimous decision batok  sa beteranong si Pedro Malco (14-15-2). Si Haya nakakuha og iskor nga 96-94, 96-94 ug 97-93.

Sa laing bahin, gisugat og kapildihan si Sherwin Paro sa ALA Gym sa iyang pagbalik sa dihang gipaundang kini ni Nelson Llanos sud lang sa 36 segundos.

Human siya matiyempohi   sa makasiak nga right straight ni  Llanos nga mitama  sa iyang suwang nga maoy  nakatumba kaniya, si Paro misuway og bangon apan ang iyang kampo alisto  kaayong  mi-itsa og tualya nga nakapaaghat ni referee Ben Necessario paghunong sa away.

Sa laing mga away, si Jether Oliva (8-0, 7KOs) nakabawi human kini matumba sa ikalima nga round aron pagpukan ni  Roel Honor pinaagi sa unanimous decision, si Jason Pagara mitumba ni William Jorge sa oras nga 1:46 sa third round, si Ray Las Piñas midaog batok ni  Renan Branzuela sa ilang unang away, samtang si Eman Labanza sa Tagbilaran City milupig ni Steven Garrett sa America.

Pulos gitabla ang away nilang Jerson Mancio batok Ed Earl Orellano ug Alde de Zosa batok Allan Jay Tuñacao.