Human sa malampusong pagpahigayon sa 62nd National Students Basketball Association (NSBC), ang notadong sports patron nga si Lorenzo 'Chao' Sy mapasigarbuhong mipahibalo nga ang Sugbu maoy mo-host sa Asian University Games (AUG) Championship nga gikatakda sa Hulyo 5-12
ning tuiga diha sa Cebu Coliseum.
Wala’y bisan gamay nga pagbasol si Sy bisa'g nalugi siya pag-host sa NSBC championships dili pa dugay.
Matud pa ni Chao Sy, ang AUG orihinal nga gikatakda sa Tokyo, Japan.
Napulo ka teams ang gilaumang mosalmot sa usa ka semana nga kompetisyon lakip ang mga representante gikan sa Japan, Korea, China.
Ang Philippines mopaduwa og lima ka teams, tulo gikan sa Cebu ug duha gikan sa Manila.
Ang AUG mao unya ang ikaduhang daku nga kalihukan sa basketbol dinhi sa Sugbu sunod sa NSBC.
Sa laing bahin, si kanhi Rep. Prospero 'Butch' Pichay mihulagway sa bag-o lang natapos nga NSBC nga impresibo ug malampuson.
Matud pa ni Pichay kun midayon pa og boycott ang Southwestern University (SWU) Cobras dili unta makadaog og korona.
Isip ganti paglangkat sa titulo sa NSBC, ang SWU Cobras hatagan og tiket alang sa ilang pagsalmot sa Fujian Invitational Tournament sa China sa unang semana sa Abril. Uban nila mao ang kampiyon sa high school nga Benedictine International School (BIS) sa Quezon City.