Semifinal sa 1st Inter-City Challenge Cup
Sugdan na karong gabii ang semifinals sa 1st Inter-City Challenge Cup basketball tournament diin upat ka teams ang mopakita’g labok sa duha ka managlahing mga binyu.
Ang duwa sugdan sa alas- 7:00 sa gabii.
Ang second-seed Bogo City Bogoys mo-host batok sa third seeded Talisay Aquastars sa Don Celestino Martinez Sr. Memorial Coliseum sa amihanang bahin sa Sugbu.
Samtang ang no. 1 Lapu-Lapu City Chiefs mao usab ang mo-host sa fourth-seed Danao City Pistols sa Lapu-Lapu covered court.
Ang Chiefs ni coach Larry Villanil maoy gipaboran sa ilang pakigsangka batok sa Pistols tungod sa ilang ka-teamwork.
Sa laing bahin, ang Bogoys ni coach Hermes Sumalinog dili angayan mokompiyansa sa ilang kaatbang tungod kay ang Aquastars dili sab magpabitin ug aduna kini ikabuga sama nilang Rico Tabar ug sa manag-agaw'ng Alejandro ug Alfie Cabañero.
Ang Bogoys pangulohan nilang Jun Ace Ursal ug Noel Balili.
Si Villanil magsalig sa iyang mga starters nga naglakip nilang Jarjar Degamo, Adonis Morata ug Ritchel Falcon, samtang ang Pistols mosandig nilang Tito Batulan ug Reynan Capoy.
- Latest
- Trending
