Mibalik na sa ilang hugtanong training ang managsuong Mary Stephanie ug Mary Evangeline Agbay agi'g pagpangandam alang sa national ug international wushu competitions karong summer.
Ang managsuong Agbay unang mopakita’g aksiyon sa National Open Wushu Championships nga gikatakda karong Abril 15 sa kaulohan.
Gawas nilang Mary Stephanie ug Mary Evangeline, aduna pay pipila ka mga Sugbuanon ang mopakita’g aksiyon sa national open.
Human sa Manila, sila si Stephanie ug Evangeline gikatakdang mosalmot sa 2008 Asian Wushu Championships karong Mayo 10-17 didto sa Macau, China.
Sa laing bahin, ang managsuong Agbay pasidunggan sa ipahigayong 26th Sportswriters Association of Cebu-San Miguel Corporation (SAC-SMC) All-Cebu Sports Awards karong Sabado sa alas-7:00 sa gabii sa Laguna Garden Restaurant.
Si Mary Stephanie usa sa mga major honorees sa SAC awards ning tuiga, samtang ang iyang manghod ang modawat og special citation tungod sa ilang dakung kalampusan sa 2007.