USC-North gipalayas sa SHS-J

Gipalayas sa Sacred Heart School-Jesuit (SHS-J) ang University of San Carlos (USC) North Campus sa iskor nga 25-17 aron pagsakmit sa Cebu leg title sa 2008 Cherifer Tangkad Sagad 12-Under basketball tournament niadtong Domingo didto sa  Don Bosco covered courts sa barangay Punta Princesa, ning siyudad.

Ang SHS-J Eagles nga gimaneho ni  Anton Bennet Chua, ang anak sa notadong sports patron  nga si Benedict Chua milangkat sa gikaibgan nga korona nga walay pilde.

Ilang gilubong  ang University of Southern Philippines Foundation (USPF) sa iskor nga 34-10 sa wala pa nila buntoga ang USC-South sa iskor nga 17-12.

Sa semifinal, ang SHS-J mao sab ang mipatigbabaw batok sa Danao City-Time Out aron moduwa sa final uban  sa USC-North kinsa miharos sab sa eliminasyon.

Gawas nga maoy bag-ong gikoronahan kampiyon, ang tandem ni coach Jed Cabellon ug sa player niining si Jarek Mercado mipukan sab sa St. Anthony Learning Center nilang PJ Cardeño ug James Bacalso aron paghari sa two-ball competition.

Sa laing bahin, ang pambato sa USC-North nga si  Andre Armenion, anak ni kanhi UC star Alex Armenion maoy tigas sa three-point shootout.

Sa guest team category, ang Sirlitz One-on-One Clinic ni coach Edsel  Vallena maoy milangkat sa titulo.

Ang national organizer sa Cherifer competition mao si Bernard Ocampo, samtang  ang Cebu leg coordinator mao si Britt  Carlo Reroma,  ang SBP coach sa San Beda College.