Gilampurnas sa Sam’s Moondogs, Hayden ug sa San Remigio Beach Club (SRBC) ang tagsa-tagsa ka kaatbang sa pagpadayon sa 2008 K Gallery First Conference basketball tournament didto sa Visayan Glass Gym sa barangay Guadalupe ning siyudad.
Si Martin Grogaard miposte og 17 puntos alang sa Sam’s Moondogs nga mimasaker sa Diakon sa iskor nga 74-56, ang Hayden milubong sab sa El Deneyroa sa iskor nga 82-48, samtang ang San Remigio Beach Club mimakmak sa Yayoy’s Grill sa iskor nga 68-54.
Mibanlas dayon og mga puntos ang San Remigio Beach Club pagsugod sa duwa ug ilang gibiyaan og kuwatro puntos ang Yayoy’s Grill nga gipangulohan ni Rocky Alcoseba sa iskor nga 14-10 paghuman sa first quarter.
Mitubo pa ang labaw ngadto na sa 12 puntos, 50-38 paingon na ngadto sa katapusan ug final quarter.
Ang Yayoy’s Grill nga wala na makapugong sa nagpungasing opensa sa San Remigio Beach Club nakatilaw sa labing una nilang kaparotan ning maong torneyo.