Nasulod sa top 10 ang Sugbuanong si Jon-Jon Adlawan sa bag-o lang natapos nga 2008 Motocross Masters of Asia-Puerto Princesa International Motocross Grand Prix didto sa Sta. Monica International Racetrack sa Puerto Princesa City sa Palawan.
Ang 16-anyos nga si Adlawan miangkon sa ikawalo nga dapit sa 21 riders nga miapil sa maong kompetisyon.
Gawas pa niini, si Adlawan midominar sab sa experts division atol sa national race, ang preliminary event sa FIM Asia’s first leg.
Si Adlawan sa Power Sports Racing (PSR) mipahiluna sab sa ikatulo nga dapit sa pro class luyo nilang RP’s motocross king Glenn Aguilar ug Kenneth San Andres.
Ang teammate ni Adlawan sa PSR nga si Ryan Alquisola nakaangkon sab og dakung dungog dihang iyang gidominar sa beginner’s class. Iyang gilupig ang kauban niyang Sugbuanon nga si Andrew Canlas. Si Alquisola nahimutang sab sa ikaduha sa novice division human mapilde sa rider gikan sa kaulohan.
Sa laing bahin, usa sa mga pambato sa PSR nga si Jubenile Abellar nakaangkon og injury.
Matud pa ni Jonas Adlawan nga ang batan-ong Abellar nakaangkon og buak sa bukog sa iyang walang bitiis.
"Natukod niya pag-practice. Kusog kayo iyang dagan,so grabe ang impact.Sayang lagi kayo," matud pa ni Adlawan dinhi sa Banat News.
Tungod niini, si Abellar kinahanglan nga mopahulay og upat ka bulan alang sa hingpit nga kaayohan sa iyang injury.
Ang mga Sugbuanong riders gipaluyohan sa Cebu Pacific, Oz Racing, The Palawan Bank, RDAK Motorsports ug Deco Sales Incorporated.