Kutob karong adlawa pagduso sa line-ups

Gipahinumduman ni Britt Carlo Reroma, ang Cebu leg organizer sa  Cherifer Tangkad Sagad 12-Under basketball tournament  ang tanang partisipanteng koponan nga kutob lang karong adlawa ang pagduso sa ilang line-ups.

Matud pa ni Reroma nga ila kining gihimo aron mabahig ang mga teams sa labing daling  panahon sa dili pa ang kompetisyon karong Marso 1 diha sa Don Bosco covered courts sa barangay Punta Princesa, ning siyudad.

Malaumon si Reroma nga mosaka ngadto sa 24 ka mga partisipante ang  mosalmot  ning tuiga. Sa miaging tuig aduna lamang kini 17 ka koponan ang nipakita'g aksiyon.

Lakip sa mga bag-ong teams nga nadasig sa pagpakita sa ilang mga abilidad mao ang Cebu Eastern College (CEC), St. Alphonsus Catholic School (SACS) sa Lapu-Lapu City, St. Anthony Learning Center, Immaculate Heart of Mary School, San Roque Learning Center sa Liloan-Cebu, Sirlitz Clinic ug ang Danao Sports Commission-Time Out.

Sa miaging tuig, ang USC-North Campus ni coach Roland Remedio mipukan sa Don Bosco sa final aron paghari sa inaugural edition sa tinuig nga kompetisyon.