Gibuksan na sa Neighboring Barangays Sports Association (NBSA) ang ilang tinuig nga basketball tournament sa miaging adlaw didto sa Mabolo Sports Complex.
Katorse ka barangay gikan sa Cebu City North District ang mag-ilog sa korona ug kini mao ang Camputhaw, Parian, T. Padilla, Tejero, Hipodromo, Kamagayan, Lorega, San Antonio, Sta. Cruz, Zapatera, Day-as, Carreta, Bo. Luz ug barangay Mabolo.
Usa ka parada sa nagkalain-laing mga koponan gikan sa mga partisipanteng koponan ang gipahigayon.
Matag barangay adunay representante sa tulo ka kategoriya nga naglakip sa Midget alang sa nag-edad og 17 anyos ug paubos, Juniors division alang sa 34 anyos ug paubos ug Seniors alang sa nagpangedaron na og 35 anyos pataas.
Ang varsity ug commercial players gidid-an sa pag-apil sa maong torneyo.
Ang Mabolo maoy host sa maong kalihukan ubos sa liderato sa maabtikon nga barangay chief executive Rey Ompoc uban ni Efren Sanico isip commissioner sa maong torneyo.
Ang NSBA sports tournament gitukod ni kanhi Barangay Captain Michael Ocleasa sa barangay Day-as, ning dakbayan. (Yoyo R. Abayan)