Si PABA ranked No. 2 minimumweight Sofyan ‘Cobra’ Effendi sa Indonesia gikatakdang mohagit ni defending champion Milan ‘Milenyo’ Melindo alang sa World Boxing Organization (WBO) Asia-Pacific minimumweight crown sa main event sa lain na sab nga ALA Promotions boxing card karong Marso 7 diha sa Mandaue City Cultural and Sports Complex.
Si Effendi (7-4-1, 6KOs) mangtas ug gikahadlokan nga boksidor gani sa katunga sa iyang gipangpilde kutob lang sa tulo ka rounds.
Nabantog sab si Effendi nga lig-on ug isog ug mokilaw sab kini og kumo.
Nakaharong sab kini sa mas labaw pa niya ka bangis sama ni Heri Amol.
Gipamatud-an ni Effendi ang iyang kalig-on batok ni reigning PABA minimumweight champion Kwanthai Chor Nor Pattalung (17-0-1) sa ilang away nga miabot og 12 ka hugna.
Bugtong nakapilde ni Effendi mao ang Pinoy’ng boksidor nga si Bert Batawang (49-6-0) pinaagi sa knockout.
Sa supporting main event, si Weng Haya moharong ni Pedro Malco sa Butuan City.
Lain pang unom ka away ang gihan-ay sa undercard, upat ka special attraction rounds diin si Seven Garrett sa Texas makigsangka batok ni Eman Labanza sa Tagbilaran City ubos sa jr. featherweight division. (Yoyo R. Abayan)