Andam na ang tanan

Plansado na ang tanan alang sa pagpahigayon sa 3rd Operation Southern Cross nga ulohan og “Cebu City Mayor’s Cup Airsoft  Military Simulation Challenge karong Sabado ug Domingo diha sa South Reclamation Property (SRP).

Si Frank Horfilla, ang event organizer  nagkanayon nga aduna nay 12 ka teams ang mikompirmar sa ilang partisipasyon ning duha ka adlaw nga kompetisyon nga gipresentar sa Tactical Action Games, Incorporated.

Ang dakbayan sa Bacolod, kinsa maoy kampiyon sa Operation Southern Cross niadtong 2005 mopadala og tulo ka teams, samtang usa gikan sa Dumaguete City.

Aduna say contingents gikan sa Cebu City Police Special Weapons and Tactics (SWAT) ug Navy personnel gikan sa Naval Force  Central Command (NAVFORCEN).

Matud pa ni Horfilla nga ang 3rd Operation Southern Cross usa ka hagit ug dili kompetisyon tungod kay mga partisipanteng koponan dili magsangka sa usa’g usa.

“The Operation Southern Cross is a challenge not a competition because the participating teams will not go up against each other. They will go up against the opposing members of Team EMC who are highly-trained in airsoft warfare ,”  matud pa ni Horfilla atol sa  press conference niadtong miaging adlaw didto sa Jollibee fastfood  sa Panagdait, Mabolo (atubangan sa PASEO).

Ang 3rd Operation Southern Cross gilangkuban og lima ka military simulation scenarios diin ang mga partisipanteng koponan mag-abot.

Usa nga makapahinam sa pagpahigayon sa maong kalihukan ning tuiga mao nga ang tanang mga partisipanteng koponan ibutang sa mock-up firebase nga tukoron diha sa Sugbu grounds.

Ang kompetisyon sugdan pinaagi sa full military obstacle course nga gisundog human sa Philippine Military Academy’s TAPS Challenge sa alas-9:00 sa buntag.

Ang tanang mga senaryo sa kalihukan ipahibalo lamang ngadto sa mga partisipante sa dayon na nila’g biya sa base.