Phone Pals batok ML Jewelers
Masukod na ang kalidad sa duwa sa gikaintapang koponan sa Sugbu, ang M. Lhuillier Kwarta Padala-Cebu City Jewelers sa Mindanao Visayas Basketball Association (MVBA) sa dihang makigsangka kini sa Talk N’ Text Phone Pals sa Philippine Basketball Association (PBA) sa usa ka exhibition game karong alas-7:00 sa gabii diha sa Cebu Coliseum.
Ang goodwill game tipik lamang sa kasaulogan sa ika-71 nga anibersaryo sa Cebu City Charter ug kini ipahigayon nunot sa pagbulig sa Samahang Basketbol ng Pilipinas (BAP-SBP) pinaagi sa ilang presidente nga si Manuel V. Pangilinan ug ni Visayas area head Michel J. Lhuillier.
Ang maong duwa motimaan sab sa labing unang pagtimon ni Vincent ‘Chot’ Reyes isip bag-ong coach sa Phone Pals atubangan sa publiko sukad mipuli ni Frederick Pumaren.
Atbangan ni coach Reyes ang katakus ni multi-titled coach Raul ‘Yayoy’ Alcoseba.
Una sab kining higayon nga magkasangka si Chot ug iyang igsuong si Mike gumikan kay ang naulahi mao man ang assistant coach ni Alcoseba.
Napun-an ang kaisog ug ang kalig-on sa M. Lhuillier gumikan kay napuno man sa ilang line-up si kanhi PBA player Don Camaso. Gawas ni Camaso, laing mga ex-PBA players moduwa sa Jewelers naglakip nilang Bruce Dacia, Stephen Padilla, Danny Aying, Leo Bat-og, Dale Singson ug Ronald Capati.
Mokompleto sa ilang line-up mao sila si Jayford Rodriguez, Enrico Llanto ug Gerry Cavan.
Ang Phone Pals nga nataktak sa Wild Card round sa playoffs pangulohan ni point guard Jimmy Alapag ug shooters Renren Ritualo ug Mark Cardona.
Nalakip sab sa komposisyon sa Phone Pals mao sila si Yousif Aljamal, Ali Peek, Miguel Noble, Felix Belano, Kalani Ferreria, Yancy de Ocampo, Don Allado, Harvey Carey ug Anthony Washington.
Tinguhaon sa Jewelers nga mainat ang ilang 1-1 win-loss record batok sa PBA teams. Niadtong Agosto 2006, ang Jewelers milubong sa Sta. Lucia Realtors sa iskor nga 82-69 sa Cebu Coliseum.
- Latest
- Trending
