Santillan natikangkang sa Japan

Kuwarta na, nagiging bato pa.

Nahisugamak si  Rev 'The Gentle Giant'  Santillan ning mapait nga kasinatian gumikan kay nahanaw  daw  aso ang iyang kahigayonan nga makadawat  og makabungog nga US$200,000  nga premyo sud lamang sa usa ka away human sa iyang kapildihan pinaagi sa sixth round TKO ngadto ni Motoki Sasaki sa Japan niadtong Sabado sa gabii didto sa Korakuen Hall sa Tokyo, Japan.

Gumikan sa maong kapildihan, si Santillan gihuboan sa iyang korona  isip  hari sa Oriental and Pacific Boxing Federation (OPBF) welterweight.

Ang manedyer ni Santillan nga si Rex 'Wakee' Salud mitug-an sa  philboxing.com nga gumikan sa maong kaparotan, nahanaw  ang damgo ni Santillan nga mopakita'g aksiyon sa usa ka dakung promosyon ni Bob Arum diin  modawat  unta siya og 

labing daku nga premyo sa 13 ka tuig na niyang pamuksing.

Matud pa ni Salud nga si Santillan gigarantiyahan nga modawat og P9.6 milyones sa iyang 12 ka hugna nga  away batok sa way pildeng kampiyon nga si Julio Caesar Chavez Jr. alang sa WBC Continental Americas light middleweight title karong Abril 26 didto sa Queretaro, Mexico apan gikanselar ang maong away gumikan sa iyang kapildihan ngadto ni Sasaki.

Dominado kaayo ni Sasaki ang away. Mibuhi siya og makusog nga left hook nga nakapatikangkang ni Santillan sa nanghinapos nga bahin sa ikaduhang hugna.

Gitumba na sab ni Sasaki si Santillan sa ikaunom nga hugna gamit gihapon ang makabungog nga left hook. Nakabarog si Santillan, apan gilumsan kini og solidong kombinasyon  ni Sasaki hinungdan nga natumba siya sa ikatulong higayon.

Gumikan niini, gi-undang ni reperi Takeshi Shimakawa ang away sa nahibiling usa ka segundo sa  dili pa mahuman  ang ikaunom nga hugna.

Si Sasaki mi-inat sa iyang rekord ngadto sa 29-7-1 uban ang 19KOs, samtang si Santillan nadakin-as ngadto sa 24-4-1 uban ang 17KOs.