Tubil Bar kampiyon sa Power Ball

Gibaswat ni Franco Te ang Tubil Bar pinaagi sa pag-iskor og 16 puntos aron pagpukan sa Medallon Transport sa iskor 66-47 aron yano kaayong langkaton ang korona sa Power Ball Invitational basketball tournament kagahapong adlawa didto sa CEC gym.

Si Te, anak ni playing coach Dr. Boy Te sayong nanginit ug nakahimo pa og buzzer-beating lay-up sa pagtapos sa third quarter. Tungod sa iyang gipakita, siya maoy napili nga Best Player of the ballgame. Si Dr. Te kinsa nagtakiang tungod sa iyang piang sa tuo nga tikod, wala moduwa apan malipayon kaayo ilabi na kay gitapos nila ang torneyo sa 7-0 nga baraha.

Ang Medallon Transport nga napilde sab sa Tubil Bar atol sa elimination round, gipangulohan ni Norwin Baclay sa iyang 13 puntos. 

Naglabaw sa sayo pa ang Medallon, 21-15 apan sa dihang na-ilog na sa Tubil Bar ang labaw, wala na kini manumbaling pa hangtod gibiyaan murag bunot naglutaw-lutaw sa dagat ang Medallon.

Ang Tubil Bar nakalabaw og 22 puntos, 66-44 may 23 na lang ka segundos sa wala pa mahuman ang duwa.  Wala na gud kahuygo ang Medallon bisan pa og wala na makaduwa og maayo ang ilang back-up nga sentro nga si Juanito Sasing tungod kay nagisi-an siya sa iyang wala nga kilay dihang nasikhan siya ni Jess Gabatan, ang auditor sa USC-BED South Campus PTCA board atol sa ilang rebound play ug daan nang labaw ang Tubil Bar, 49-32.

Padayong namuntos si Te ug gi-abagan siya ni Vincent Reyes kinsa mi-iskor ug walo sa iyang siyam ka puntos sa kataposang bahin sa fourth quarter.

Si Jarren Magdales mitampo ug 10 puntos alang sa Tubil Bar, si Reyes may nuybe ug si Sasing otso puntos.  Ang Tubil Bar mopahigayon sa ilang victory party sunod semana diin ilang ihatag ang tropeyo ngadto kang Navarro.

Sa unang duwa, midaug ang 100 Plus batok sa Yes Marketing sa iskor 93 68 aron pagkuha sa ikatulong pwesto. 

Puntos kada usa:

Tubil Bar (66) — Te 16, Magadles 10, Reyes 9, Sasing 8, Noel 7, Lavilles 7, Esma 5, Seno 2, Mauro 2

Medallon Transport (47) — Baclay 13, P. Gabatan 7, Cabiluna 7, Doblas 6, J. Gabatan 4, Trinidad 4, Dablo 3, Lim 2 Halftime: 33-26.