Duha ka krusyal nga kadaugan sa Jeson Guardo maoy milamdag sa ilang dalan nga molangkat sa korona sa 5th Barangay Sambag I Basketball League didto sa sports complex sa nahisgutang barangay.
Ang Jeson Guardo miposte og 70-63 nga kadaugan batok sa Kalubihan ug midaog sab kini sa ilang duwa batok sa Juskie sa iskor nga 66-62.
Si Totong Villanueva maoy responsable sa duha ka sunod-sunod nga daog sa Jeson Guardo nga mi-average og 27.0 puntos matag duwa.
Si Ronan Isidro kinsa nakig-uban og duwa nilang Jimwell Torion ug Junthy Valenzuela sa dihang nagtungha pa sila sa kolehiyo sa Salazar Institute of Technology (SIT), miabag ni Villanueva sa iyang 16.5 puntos matag duwa gisundan ni Cesar Regodon nga mi-average og 10.0 puntos matag duwa.
Sa ilang duwa batok sa Kalubihan, ang Jeson Guardo walay tihik-tihik nga mipabuhagay sa ilang opensa gikan sa pagsugod hangtod sa paghuman sa unang kuwarter aron pagposte og 13 puntos nga bentaha, 26-13.
Ang Kalubihan milaslas sa labaw ug miabot na lang og otso puntos, 50-58, apan ang Jeson Guardo alistong nakabawi pinaagi sa ilang naglagiting nga opensa sa himalatyong oras aron paglansang og siyete puntos nga kadaugan.
Sa ikaduha nilang duwa, gikutasan ang Jeson Guardo og ginukod sa Juskie sa hapit tibuok bahin sa first half. Apan human sa mubo nga break, ang Jeson Guardo nakigkumbati og maayo aron pag-ilog sa labaw, 48-47 ug gikan niadto ila na nga nakontrolar ang duwa hangtod nga napupos ang oras sa duwa.
PUNTOS MATAG USA
Unang duwa:
Jeson Guardo (70) – Villanueva 28, Isidro 16, Regodon 10, Alvarado 7, Faciol 5,Tampus 4
Kalubihan (63) – Galang 25, Castillo 18, Bacalla 10, Bos 5, Boknoy 5
Ikaduhang duwa
Jeson Guardo (66) – Villanueva 26, Isidro 17, Regodon 10, Alvarado 8, Faciol 5
Juskie (62) – Fernandez 24, Saberon 19, Ipong 10, Bacalan 5, Magalang 4 (Yoyo R. Abayan)