2008 Governor's Cup Horse Show, Competition gibuksan kagahapon

Pormal na nga gibuksan ni Gobernadora Gwendolyn 'Gwen' Garcia ang 2008 Governor's Cup Horse Show and Competition kagahapon didto sa Mandaue reclamation area.

Ang kompetisyon  karon pa sugdan sa alas-9:00 sa buntag diin ang mga partisipante mopakita sa ilang abilidad.

Ang garbo sa Davao nga si  Andy Tan, ang reigning "Horseman of the Year," ug iyang anak nga si Koby moapil gihapon sa maong kompetisyon.

Lain pa nga moapil mao ang Class A riders nga sila si Jason Estrada ug Manny Salungan sa Malaybalay, Bukidnon ug Echo Roa sa Cagayan de Oro City.

Dili sab magpabitin ang Sugbu kay anaa sila si Jun ug Francis Miñoza nga nakalinya sa Class B ug Jose Abalos ug uban pa.

Magtigi sila sa show jumping, barrel race karong adlawa ug magsambunot kini sa obstacle course sa youth, auxiliary ug royal categories ugmang adlawa.

Ang tartanillas gikan sa nagkalain-laing ahensiya sa kagamhanan ug mga siyudad sa Sugbu ang miparada sa opening ceremony.

Ang "Best Decorated Tartanilla" nakuha sa Department of Education uban sa Dalaguete ug Aloguinsan nga nidaog sa ikaduha ug ikatulo nga dapit.

Ang mga riders gibuak ngadto sa Class A, B, Youth, Auxiliary ug Royal.

Ang mga mananaog sa 2008 Governor's Cup makadawat og mga tropeyo ug ganting salapi atol sa awards ceremony ugma.  (Yoyo R. Abayan)