February 14, 2008 | 12:00am
Napulo’g lima ka Sugbuanong runners ang modagan sa labing daku nga marathon events, ang Standard Chartered Hong Kong Marathon 2008 karong Domingo nga manukad sa Ntahan Road sa Tsim Hsa Tsui ug matapos didto sa nabantog na kaayong Victoria Park.
Siyam sa 15-man Cebu contingent modagan sa Full Marathon nga may gilay-on nga 42 kilometros. Sila mao si Drs. Vic Verallo, Albert Santos, Yong Larrazabal ug Nicole Chua, uban nilang Jesse Taborada, Meyrick Jacalan, Ted Tecson, Serge Amora ug John Pages.
Si Larrazabal, kinsa midagan sa miaging tuig nga New York Marathon uban ni Dr. Peter Mancao modagan sa iyang ikaupat nga Full Marathon race. Si Mancao modagan ubos sa 21km ning higayona.
Sa laing bahin, si Leiszl Lumindas-Getaruelas maoy mangulo sa kampanya sa 21km division. Modagan siya uban nilang Drs. Mancao, Pons del Prado ug Tony del Prado.
Si Getaruelas miposte sa iyang personal best nga usa ka oras ug 24 minutos sa Mizuno Shell Sinulog Half-Marathon niadtong Enero 19, susama sab nga oras nga girehistro ni Nakamuna Koniko sa Japan nga nanghawod sa women’s 21km race sa miaging tuig nga Hong Kong Marathon.
Mokompleto sa Cebu delegation mao sila si multi-titled Mendel Lopez, Perl Jacalan ug John Pages nga makigginukdanay sa mga langyaw ubos sa 10 kilometer run. (Yoyo R. Abayan)
