Garnett, out; Wallace, in

Dili makaduwa ang superstar sa Boston Celtics nga si Kevin Garnett  sa  West vs. East  All-Star Game didto sa New Orleans, Louisiana karong Pebrero 17 tungod sa "abdominal strain" kon pagsige'g  sakit sa tiyan.

Ang maong pahibalo gipagawas sa commissioner's office dihang si Garnett wala  na mopakita'g aksiyon sud sa pito ka sunod-sunod nga duwa tungod sa kakulian.

Si Garnett,  usa  sa  lima ka starters sa  East All-Star hulipan ni Rasheed Wallace sa Detroit Pistons. Si Garnett  moduwa unta sa iyang ikapitong  sunod-sunod nga All-Star Game.
"He’s out until the All-Star break," matud pa ni Celtics coach Doc Rivers mahitungod sa kahimtang ni Garnett human nila  pildeha  ang defending champion San Antonio Spurs, 98-90 sa  ilang duwa  kagahapon didto sa Banknorth Garden sa Boston, Massachusetts.
Ang Celtics nga adunay  39-9 nga baraha, midaog na og  lima sa pito ka duwa bisan  wala si Garnett.

Si Garnett  nga  mi-averaged og 19.2 points ug 9.9 rebounds matag duwa  sa wala pa mipadaplin duha ka semana na ang milabaw human misakit ang tiyan niadtong Enero 25 sa ilang duwa batok sa Minnesota Timberwolves. Siya maoy nag-una sa nakakuha og dakung botos sa All-Star game, apan si Rivers miingon nga si  Garnett posibleng dili  moduwa sa katapusang duha ka duwa sa Bostons sa dili pa ang break.

Si Rivers kinsa mao sab ang mo-coach sa East sa All-Star Game miingon  nga nanghinaot siya si Ray Allen ang mohulip ni Garnett.

"He should be (an all-Star) anyway, I wouldn’t be surprised if it wasn’t Ray they use," matud pa ni Rivers. “It would be nice to have Ray on. I would take Ray.”

Si Wallace maoy ikatulo sa  Pistons nga moduwa sa East All-Star uban nilang Chauncey Billups ug Richard Hamilton.
Si Wallace kinsa moduwa na sa iyang ika-upat nga All-Star Game, mo-average og 12.9 puntos ug 7.3 ka rebounds sa Detroit ug siya sab  ang  lider sa blocks ug steals sa ilang team.

Si Wallace makig-uban sa iyang teammates nga sila si Chauncey Billups ug Richard Hamilton.