Sugdan na karon

Ang 1st Hapee Online Challenge Cup Under-17 Basketball League moulbo karong adlawa diin duha ka duwa ang ipahigayon diha sa Don Bosco Technological Center field sa barangay Punta Princesa, ning siyudad.

Unang magsangka sa usa ka exhibition game nga gikatakda sa ala-1:00 sa hapon, ang Dewfoam-United Architects Basketball Club (UABC) ni Allan G. Choachuy moharong batok sa Cebu Eastern College (CEC) Batch '88 ni team director Rey Kenneth Ng.

Sa main game sa alas-2:30 sa hapon, ang Don Bosco Greywolves manalipod sa ilang balwarte sa pagpanulong sa University of San Carlos (USC)-South Grade School ni coach Christopher 'Ope' Abellana.

Mokompleto sa unom ka team nga moduwa sa torneyo mao ang Center for International Education (CIE), Cebu  Eastern Collge (CEC) Dragons, Pajo Selection sa Lapu-Lapu City ug Hapee Online.

Si Mark Tallo, ang Hapee Online Training Director miingon nga ang torneyo mosubay og single round robin format diin ang  nag-unang upat ka teams moabante sa crossover semifinals. Ang mga mananaog  moduwa sa tinaktakay nga kampiyonato.

Special awards ang madawat sa top individual achievers sama sa Dewfoam Best Player of the Game, tournament ug Final

MVPs ug mga sakop sa Mythical Five selection.

Sa laing bahin, ang Hapee Online basketball training camp gikatakdang sugdan karong Abril 1 diha sa Cogon-Ramos Gym.

Niadtong buot magpakisayod, tawag lang sa  256-2059, 0910-5576443   ug 0917-7409873 o  e-mail  sa [email protected]