Boksidor namatay

Nakilatan na sab og trahedya ang Philippine boxing human si world-rated Alex 'The Maasin Bomber' Aroy namatay pipila ka oras human sa iyang kapildihan pinaagi sa unanimous decision ngadot ni Arnel Tadena sa ilang 10 ka hugna nga kumbati niadtong Lunes sa gabii didto sa Villaba, Leyte.

Si fight supervisor Lando Mendoza sa Games and Amusements Board (GAB)-7 nagkanayon nga nakugang siya sa nahitabo gumikan kay maayo man kaayo ang gipakitang away ni Aroy ug wala kini mipakita og mga timailhan nga aduna kini laing gipamati sa iyang lawas.

"Dili gyud ko makatuo sa nahitabo. Maayo man gud kaayo ang duwa ni Aroy bisan og alkansi siya sa puntos. Human sa away, maayo man ang kondisyon ni Aroy mao to nga na-shock ko pagkahibalo nga namatay siya," matud pa ni Mendoza.

Samala sa manedyer ni Aroy nga si Rex 'Wakee' Salud nga gi-ingnan siya ni Willie Flores nga maoy matchmaker sa Villaba fight card, nga si Aroy mi-reklamo nga dili siya maka-ihi human sa away ug nakuyapan.

Mao nga ilang gidala si Aroy sa tambalanan apan gumikan sa kakulang og kasangkapan, gitambagan sila nga mobalhin og laing hospital didto sa Palompon apan si Aroy gikataho nga nakabsan na sa iyang kinabuhi sa wala pa maabot sa tambalanan.

"Kalit kuno kaayo ang hitabo. Si Aroy namatay samtang padung sila sa Palompon. Walay klaro nga timailhan sa hinungdan sa iyang kamatayon," matud pa ni Salud nga nagbangotan sa pagpanaw sa usa sa iyang mga boksidor.

Segun sa gisaysay kaniya ni Flores, si Salud mibutyag nga si Aroy mireklamo nga sakit ang tiyan niini niadtong buntag sa adlaw sa away. Apan human kini mahatagi og medikasyon, si Aroy nagkanayon nga maayo na ang iyang paminaw ug gusto kining mo-away.

Atol sa routine medical check-up, si Aroy gihatagan og permiso  ni ringside physician Zoilon Wilfred del Rosario nga mo-away gumikan kay wala kini nakitang deperensiya  sa kahimtang ni Aroy.

Nagkanayon pa gani si Mendoza nga si Tadena pa gani unta ang dili maka-away gumikan kay high blood kini. Apan sa ikaduhang BP test, nakapasar  si Tadena maong nahinayon ang kumbati.

"Nag-agi man og saktong medical procedure si Aroy sa wala pa ang away ug pagkahuman niini. Gi-cleared siya sa doktor nga mo-away kay naka-meet man siya sa gikinahanglan nga medical requirements,"  matud pa ni Mendoza.

"Gawas pa, dili man one-sided ang away ug wala sab mireklamo si Aroy nga naglabad o duna siya gibati nga sakit sa iyang ulo. Conscious kaayo siya human sa away mao to nga nagtuo mi nga okay ra siya. Dili nato makontrolar ang nahitabo. Wala tay mabasol kay pagbuot kini sa kahigayonan. Nadisgrasya lang gyud, naa man guy risgo ang boksing," dugang pa ni Mendoza.

Bisan pa man niini, si Mendoza nagkanayon nga mopahigayon sila og makuting imbestigasyon ug dayon moduso og pormal nga report kabahin sa mga panghitabo nga may kalambigitan sa kamatayon ni Aroy segun sa mando ni GAB Boxing Division Chief Dr. Nasser Cruz.

"Angayan gyud na nila nga buhaton. Bisan og dili na nato mabalik pa ang kinabuhi ni Aroy, dapan magsilbe ni nga leksiyon sa ubang mga promoters aron dili na mabalik pa ang susamang hitabo sa atong mga boxers," matud pa ni Maasin Mayor Maloney Samaco, usa sa mga  tigpaluyo ni Aroy.

Sa iyang pagtaliwan sa laing kalibutan, si Aroy nagbitbit og rekord nga 12 ka daog - unom niini pinaagi sa knockout - lima ka pilde ug duha ka tabla sa lima ka tuig niyang pamuksing.