USJ-R, UC sugod na sa title showdown

Managlahing tumong ang anaa sa tagsa-tagsa ka huna-huna sa coach sa USJ-R/Bibbo Hotdog ug sa UC/Aspac Bank sa dihang mag-abot sila sa Game-1 sa "best-of-three" championship series sa CESAFI Reinforced Partner's Cup karong adlawa diha sa Cebu Coliseum.

Taas ang damgo sa UC aron pukanon ang USJ-R sama kataas sa ilang 6'7 nga higante nga si Jun Mar Fajardo.

Matud pa ni UC coach Roel Gomez  nga dili imposible ang pagpukan sa USJ-R kinsa bag-o lang nakaangkon og korona sa La Fortuna Cup.

Dili gyud hinuon makaseguro si Gomez kun  kanus-a nila mapukan ang  Jaguars apan sumala pa niya  ilang hatagan og maayo duwa ang kontra.

Hinuon, ang damgo sa UC daw makawang lang unya kay dili tukma  ang panahon sa ilang paghigwaos kay ang USJ-R bag-o pang milangkat og korona  sa La Fortuna Cup.

Ang Jaguars nga hinog pa sa saging lakatan ug mat-an pa sa pinya sa Bukidnon,  misalig sa katakus ni  Luther Luke Justiniani ug lain pang mga beterano nga sila si Ranulfo Malinao, Manny Gabas ug Randy Pogoy nga maoy mogiya sa batan-on talento sama nilang Armand Ponce, Lyndon Gudez, Bobby Hatague ug Jessmar Villahermosa.

Sa ilang bahin, si Fajardo  gilauman nga modeposito og dakung puntos  sa UC/Aspac Bank uban nilang Allain Abellanosa, Jonathan Canceran, Kelvin Juliane, Lawrence Agas, Miguelito Ducay, Janssen Abella ug   Jared Kane Abatayo.

Sa laing bahin, ang DBTC/Unilab-Alaxan ug ang CIT/Metro Gaisano maoy mag-ilog sa ikatulong dapit nga gikatakda sa alas-5:30 sa hapon.