Sa labing unang higayon, ang Cebu City Niños mikulit og sagunson nga duha ka daug aron pagpabuhi sa ilang paglaum aron maka-abante sa semifinals human sa ilang daug batok sa Danao Pistols, 96-80 ug sa Toledo Dream sa miaging adlaw, 97-91 sa nagpadayong 1st Cebu Inter-City Cup Basketball Challenge kaniadtong Sabado sa gabii didto sa barangay Poblacion Pardo gym.
Ang 16 puntos nga kadaugan maoy naghatag sa Niños ug dakung bentaha ingon man dakung kahigayonan sa pag-abante sa semifinals apan kinahanglan una nilang dag-on ang kataposang duha ka duwa batok sa Talisay ug Bogo.
Kung kahinumduman, napilde ang Niños didto sa Talisay ug napilde sab sila sa Bogo diha mismo sa Pardo gym. Busa, kung buot hunahuna-on, dili sayon ang kahimtang sa Niños sa ilang damgo paglangkat og luna sa semifinals kay lagi mag-agi man sila sa mata sa dagum ug naglatay sab sila og lugas sa lanot kay nagdepende man sila sa resulta sa mga duwa sa Danao kinsa may labaw og usa ka daug kontra Cebu, (3-5 ) ug ( 2-5) nga baraha.
Ang Niños kanunay gyud naglabaw bisan pa og sige'g hulga ang Danao sa pagsikit og balik diin misuway kini’g paduol ngadto sa siyam na lang ka puntos nga biya, 76-85 kapin usa ka minuto na lang ang nahibling oras.
Si Butong Villanueva maoy nangu sa Niños sa iyang 26 puntos samtang si Allen Abayata midugang og 20 puntos. Si Reynan Capoy kanhi high school MVP sa UC ug si Batulan, mi-iskor og 19 ug 17 puntos alang sa Danao.
Puntos kada usa:
Cebu City (96) — Villanueva 26, Abayata 20, Abellanosa 13, Tabolong 12, Cabo 6, Tallado 6, Labajo 6, R. Maraño 6, L. Maraño 1
Danao City (80) — Capoy 19, Batulan 17, Capoy 12, Belecario 10, Toledo 9, Paradiang 8, Almaden 3, Dumangcas 2.