Donaire guest comentator sa Gorres-Darchinyan eliminator

CEBU — Magsisilbing special guest commentator si reigning International Boxing Federation (IBF) flyweight champion Nonito Donaire Jr. sa Z Gorres-Vic Darchinyan title eliminator fight bukas sa Waterfront Hotel and Casino dito.

Natural, hindi na bago si Donaire kay Darchinyan dahil pinatikman nito ang Australian na may lahing Armenian ng kauna-unahang pagkatalo noong naka-raang taon  sa pamamagitan ng 5th round technical knockout upang kunin ang 112-pound belt sa Connecticut, USA.

Sinabi ng 25-gulang na California-based Filipino boxer na nakikita niyang mananalo si Gorres kung gagamitin niya ang kanyang skills.

“But if Darchinyan gets his way in bullying Gorres, he could win by knockout,” aniya.

Ang 12-round fight ay magsisilbing daan para sa IBF super-flyweight title na kasalukuyang hawak ni Russian Dimitri Kirilov ng Russia. Ang bout ay co-promotion ng ALA Promotions at Gary Shaw Promotions at ipapalabas ng Solar Sports sa alas-8:00 ng gabi at sa ABC-5 sa susunod na araw sa Linggo.

Kasama ni Donaire sa television panel ang veteran broadcaster na si Quinito Henson.

Ang top referee ng New Zealand na si Lance Revill ang third man sa ring, habang ang mga hurado ay sina Jon Davis ng Philippines, Montol Surichand ng Thailand at Cec Perkins ng Australia.

Ngayon ang official weigh-in sa alas-7:00 ng gabi sa Corral Room ng Waterfront Hotel.

Taglay ni Darchinyan ang impresibong 29-1 record, 23 ay knockout habang si  Gorres ay may 27-2-1 card na may 15 KOs.