Fajardo hinog na alang sa moduwa sa CESAFI

Gitug-an ni Partner's Cup commissioner Ramon 'El Presidente' Fernandez nga ang higante sa University of Cebu (UC) Webmasters nga si Jun Mar Fajardo hinog ug angay na nga moduwa sa sunod season sa Cebu Schools Athletic Foundation, Inc. (CESAFI).

Si Fernandez, kinsa nakatabang pagpalambo sa talento ni Fajardo mipahibalo niini atol sa senemanang SCOOP Forum kagahapon didto sa Baseline Restaurant nga gipangulohan ni Bobby Inoferio.

Si Fajardo gibansay ubos sa Big Man's Camp ni  Fernandez ug matud pa sa naulahi nga bugtong kakulangan ni Fajardo mao ang finers points sa fundamentals.

Si Fajardo maoy leading scorer sa UC/ASPAC Bank, kinsa nagtinguhang mosakmit sa Reinforced Partner's Cup title batok sa USJ-R/Bibbo Hotdog karong Pebrero 3 sa Cebu Coliseum.

Sa laing bahin, si UC coach Roel Gomez miingon nga dili imposible ang pagpukan sa USJ-R Jaguars apan mohimo sila og adjustment tungod kay napilde na sila niini makaduha ka higayon sa eliminasyon.

"The first game of the finals is important” matud pa ni Gomez kinsa misaad nga mohatag og nindot nga duwa sa Jaguars. “We are hungrier but we have lesser pressure than them”,  dugang pa niya.

Sa susamang kalamboan, si Fernandez mipahibalo nga ang National Basketball Training Center (NBTC) mobalik sa training karong Pebrero 9 hangtod sa Marso 18 sa matag adlaw'ng Sabado diha sa Cebu City Sports Center.