Panimalos sa ilang kapildihan didto sa Talisay maoy laraw karon sa Lapu-Lapu City Chiefs sa ilang pag-host batok sa Talisay Aquastars sa pagpadayon sa second round sa 1st Cebu Inter-City Cup Basketball Challenge didto sa Lapu-Lapu hardcourt.
Ang Chiefs kinsa napilde sa ilang pagsong sa Aquastars, 82-89 niadtong Disyembre mao karon ang lider sa liga sa ilang 5-1 nga baraha.
Katapusan nilang biktima mao ang host Cebu City Niños nga wala pa makatilaw og daog sa lima ka duwa.
Ang Talisay Aquastars adunay 4-2 nga baraha lakip na niini ang 71-73 forfeiture ngadto sa Niños niadtong Nobiyembre 30 tungod kay sayop ang numero sa uniporme nga gigamit ni Rey Maraño.
Sa laing bahin, ang Cebu Niños manulong sa Toledo Dream kinsa nagbitbit og 1-5 win-loss record.
Ang Cebu Niños magsalig sa ilang scoring leaders Butong Villanueva ug Allen Abayata, samtang ang Toledo Dream maglaum sa abilidad ex-UV Lancer Victor Mago.
Ang 1st Cebu Inter-City Cup gipaluyohan sa Omega Pain Killer, Nature’s Spring, Casino Rubbing Alcohol, CFL Focus, Yayo’s Grill, MLKP ug La Fortuna Bakery.