USJ-R, UC sa Partner's Cup finals

Milutaw gyud ang gihandom sa kadaghanan nga  ang USJ-R/Bibbo Hotdog ug UC/Aspac Bank  maoy magsangka  sa kampiyonato sa Reinforced Partner's Cup human nila gipalagpot ang ilang mga kaatbang sa semifinals  niadtong Martes sa gabii didto sa Mandaue City Sports and Cultural Complex.

Ang UC/ASPAC Bank naka-ikyas gikan sa kulbahinam nga duwa dihang ilang gipilde og usa lang ka punto ang DBTC/Unilab-Alaxan sa iskor nga 107-106, samtang lahi ang senaryo nga nabatonan sa USJ-R/Bibbo Hotdog kay yano ra kaayo nilang gilubong ang CIT/Metro Gaisano sa iskor nga 93-72.
Ang USJ-R/Bibbo Hotdog ug UC/ASPAC Bank magpinaksitay alang sa kampiyonato karong Domingo  diha  sa Cebu Coliseum.
Padayong gidominar ni Jun Mar Fajardo ang iyang mga kaatbang apan ang iyang kabangis masuwayan  na sab dihang ilang ikasangka og balik ang USJ-R  kinsa mipukan kanila sa  makaduha ka higayon sa elimination rounds.
Si Fajardo miposa og 32 puntos, samtang sila si Allain Abellanosa ug   Kelvin Juliane mitampo og 16 puntos matag usa alang sa UC/ASPAC Bank.
Ang DBTC/Unilab-Alaxan gipangulohan ni Jayford Aldave sa iyang 20 puntos.

Si Lyndon Gudez maoy nagda’g bida sa USJ-R/Bibbo Hotdog sa iyang 17 puntos

ug laing tulo niya  ka teammates miposa sab  og double figures.
Ang CIT/Metro Gaisano  gipangulohan ni Jerry Jaca  sa iyang 30 puntos. Ang CIT/Metro Gaisano maoy moharong sa DBTC/Unilab-Alaxan  alang sa ikatulong puwesto.
Puntos Matag Usa

Unang duwa:

UC/Aspac Bank (107) --  Fajardo 32, Abellanosa 16, Juliane 16, Ducay 11, Canceran 9, Agas 8, Abatayo 8, Abella 6, Connors 2, Luceño 2

DBTC/Unilab-Alaxan (106) -- Aldave 20, Villaver 16, Colegado 16, Enterina 15, Sasuman 11, Baring 9, Oberes 7, Caballero 6, Delos Santos 2, Añagap 2, Apura 2

Ikaduhang duwa:

USJ-R/Bibbo Hotdog (93) -- Gudez 17, Justiniani 14, Ponce 12, Villahermosa 12, Duran 7, Pogoy 7, Hatague 6, Malinao 6, Bibera 5, Pateño 4, Soliman 4, Gabas 2

CIT/Metro Gaisano (72) -- Jaca 30, Demape 15, Abobo 11, Reyes 7, Resilla 6, Cañete 2, Capaning 1