USJ-R vs. SWU sa La Fortuna Cup II finals

Yano ra kaayong misulod  sa finals ang University of San Jose-Recoletos (USJ-R) Jaguars human nila hatagi og leksiyon ang Asian College of  Technology (ACT) Cyber Knights pinaagi sa pag-iskor og 98-86 nga kadaugan kagabii aron pagtapos La Fortuna Cup elimination bitbit ang  4-0 sweep didto sa Talisay gym, dakbayan sa Talisay.

Ang Jaguars makigsangka sa Southwestern University (SWU) Cobras sa finals karong Pebrero 1 diha sa Cebu Coliseum.
Unang milangkat og luna sa finals ang Cobras human  nila gilubong ang Salazar College-Salazar Institute of Technology (SC-SIT) Skyblazers sa iskor nga105-80.
Ang ACT Cyber Knights maoy makigsangka sa University of San Carlos (USC) Warriors alang sa ikatulong dapit.

Gitapos sa Cobras ang eliminasyon sa baraha nga 3-1, ang Cyber Knights, 2-2, ang Warriors, 1-3 ug ang Skyblazers, 0-4.
Si Luther Luke Justiniani, ang labing tang-an sa team maoy nangu sa Jaguars sa iyang 20 puntos ug nakakuha sab kini og suporta gikan nilang Lyndon Gudez kinsa miamot og 15 puntos ug Randy Pogoy nga mitunol og14 puntos.

Nausik lang ang nahipos nga 26 puntos ni Adelbert 'Dondon' Nuñez kay wala kini makatabang sa pagpadaog sa iyang koponang ACT Cyber Knights.
Sa laing bahin, ang garbo sa barangay Mercedes, Poro Camotes nga si Eliud Poligrates maoy nangu sa SWU Cobras sa iyang 27 puntos. Si Mariano Canonigo kinsa mibalik na

sa aksiyon gikan sa injury mitampo og 11 puntos.

Sila si Clifford Amarado ug Jeffrey Tampus nga pulos mi-iskor og 19 puntos maoy nangulo sa pilderong Skyblazers.
Ang La Fortuna Cup II gipaluyohan sa Hotel Fortuna, La Fortuna Bakery, Pepsi Cola ug Nature’s Spring.